Væleydnað matskeið fyri børn og foreldur

Lærarar og luttakarar á matskeiðnum fyri børn og foreldur, sum varð hildið á Húsarhaldsskúla Føroya 20. september 2012.

Í heyst hevur verið skipað fyri tveim­um matskeiðum á Húsar­haldsskúla Føroya. Fyrra skeiðið varð hildið 20. september, tað seinna 27. oktober. Skeiðið byggir á tey vælumtóktu Go Cook-skeiðini hjá FDB.
Tað er Jóhanna á Tjaldrafløtti, leiðari á Húsarhaldsskúlanum, sum saman við lærarum á skúl­an­um hava skipað fyri skeiðunum, har ikki færri enn 40 foreldur og børn hava luttikið. Áhugin var so mikið stórur, at pláss var ikki fyri øllum, sum vístu áhuga.
FK var við til at stuðla til­tak­in­um við vørum og øðrum til­fari, ið nýtt var til skeiðini. Í tí sam­bandi hava vit biðið Jóhonnu á Tjaldrafløtti greiða okkum frá, hvussu skeiðið, ið varð hildið 20. september hepnaðist.
– Tað riggaði sera væl. Vit høvdu ikki roknað við so stórari undir­tøku, og tí vóru vit eitt sindur ivasom, um pláss fór at verða fyri øllum, ið ynsktu at luttaka. Men hetta var eingin forðing fyri, at alt kundi ganga sum smurt.
Skeiðið byrjaði við, at eg hevði eitt ástøðiligt upplegg, har vit brúktu ein tíma til at greiða frá týdninginum av heilsugóðum mati, sigur Jóhanna. Hetta varð gjørt á einum stigi, har børnini eisini kundu fáa nakað burt­urúr. Evnið var rótfruktir, og orsøkin til, at hetta evni varð valt, er lut­víst tann, at rótfruktir eru heilsu­góður matur, lutvíst tí, at fólk sum heild hava ilt við at ímynda sær, hvat rót­fruktir kunnu verða brúktar til, og har­umframt tí, at hetta er árstíðin fyri rótfruktir.
Rótfruktirnar, ið nýttar vóru á skeiðnum vóru gularót, reyð­rót, pastinakk og persillurót. Lut­tak­ar­arnir fingu fyrst høvi at smakka ymiskar rótfruktir. Foreldur og børn fingu ein bakka við rótfruktum, ið vóru stoktar ella kókaðar, so møgu­leiki var at kenna mun á teimum ymsku mátunum at tilgera matin. Síðani varð tosað um, hvussu smakk­urin og fastleikin í rótunum kendust.
Arbeitt var við o.u. 15 ymiskum uppskriftum, ið fevndu um suppu, døgurða, salatir, ymisk sløg av eplum, bollar og okk­urt at hava aftur við einum drekkamunni.
Umframt at tilgera rótfrukt til ymiskar rættir varð eisini arbeitt við ymisk sløg av frukt, har luttakararnir lærdu at gera ymiskar figurar úr frukt­ini og at prýða við henni til borð­reiðingina. Eitt nú vóru ananas skorið til stjørnur, burtur úr blom­kálinum vórðu gjørd lomb, ið fingu vín­drúvur til eygu, og burtur úr appilsin vórðu kurvar gjørdar og onkur gjørdi bát burtur úr agurk.