Neyðugt við fólka­ræðisligum handils­felagsskapum sum FK

Brot úr frágreiðingini hjá formanninum, Róa Eliasen:

Rói Eliasen er formaður fyri FK

Ein ársfrágreiðing lítur aftur um árið, sum fór, men skal eisini vísa á leiðir fram eftir. Um ein kennir tað farna, hev­ur ein betri førleikar til at halda og finna kós fram eftir.

Síðan ultimo 2012 hava vit virkað eftir einari strategi, har vit hava sett út í kortið, hvat vit vilja fram til 2017. Henda strategi er bygd á okkara framtíðarkanning­ar – swot-kanningar – og er knýtt at okkara visión. Út frá hesum eru so okkara mál og tíðarætlanir settar upp. Ein stóran part av hesari strategi skuldu vit byrja upp á í 2013. Til dømis skuldu vit byrja at nútímansgera handlarnar, bæði hvat viðvíkur at innrætta og at nútímansgera innbúgvið, her undir at útskifta gomlu køli- og frystiskipanina, ynski um at økja um søluna á nethandlinum til tað tvífalda fram til 2017 osv. Hetta arbeiði er komið væl áleiðis. Nýggjur handil letur upp í Fuglafirði tann 1. september 2014. Tann gamli verður/er seldur til kommunu­na. Karmarnir og staðsetingin av hesum handlinum verða munandi betri enn hjá tí gamla. Vit eru bjartskygd við hesum handli og vóna, at gongdin við nýggja handli­num verður betri enn í tí gamla, eisini tí, at vinnuvirksemið nærhendis nýggja handlinum verður økt í bygdini, samstundis sum handilin letur upp. Annars verða stórar ábøtur og fríðkan eisini gjørdar á allar handlar í land­in­um í løtuni.

At virka sum starvsfólk ella sum álitisfólk í FK gev­ur meining. Hví? Tí tú sum limur ert eigari! Tað hev­ur víst seg – ikki minst í 0´unum – at ikki einans marknaðarkreftir kunnu føra samfeløg fram eftir, heldur tvørtur í móti. Tað er eisini neyðugt við fólkaræðisligum handilsfelagsskapum sum FK, har borgarin/limirnir/kund­in kunnu hava ávirkan á framleiðslu, sølu og marknaðarføring hjá virkinum. Tað er júst her, at FK – sum felagsskapur – hevur sína heimild og serstaka styrki. Eitt FK slogan frá 1952 ljóðaði: ”Ei at tjena frá øðrum, men hvør at tæna øðrum”.

Fari at enda at takka álitisfólkunum, handilsligu leiðsl­uni og starvsfólkunum fyri gott samstarv og dygdargott arbeiði í farna ári. Somuleiðis fari eg at ynskja teimum nývaldu til lukku og góðan arbeiðshug. Keypssamtøkan stendur fyri stórum avbjóðingum komandi tíðina. Okkara upp­gáva er at vísa í verki, hvat Føroya Keypsamtøka stendur fyri.