Pasta og høsnarungi í somu grýtu við italskum kryddi

Hendan lekkra ‘one pot pasta’ uppskriftin er ment í samstarvi millum Coop og gourministeriet.dk. Við í uppskriftini er eitt heimagjørt italskt kryddbland.

Hevur tú ikki alt inni, sum stendur á listanum, kanst tú blanda tað, sum tú eigur, og tú heldur hóskar saman. Brúka øll tíni yndiskrydd, her eru ongin mørk.

Tilfar

• 400 g av pasta
• 450 g av høsnarungabringu, skorin í smáar terningar
• 1 grovt hakkaður leykur
• 3 fín hakkaðir hvítleyksbátar
• 1 nevi av sólturkaðum tomatum, skornar í strimlar
• 2 dósir av cherrytomatum
• 7 dl av høsnaboullion
• 2 dl av róma
• 1 spsk. av italskum kryddblandi (les niðanfyri)
• 1 nevi av frískum basilikum
• 1 pakki av drenaðum mozzarella
• 60 g av rivnum parmesanosti
• Salt
• Pipar
• Olja

Soleiðis gert tú

Hita oljuna í stórari grýtu og brúnka høsnarungaterningarnar, meðan tú kryddar við salti og pipari. Skal ikki gjøgnumsteikjast beinanvegin, men bert brúnkast á kantunum.

Koyr leyk, hvítleyk og italska kryddið í grýtuna og steik í nakrar fáar minuttir.

Stoyt dósirnar við cherrytomatum, høsnaboullion, róma, pasta, sólturkaðar tomatir og basilikum í grýtuna og kóka upp.

Skrúva hitan niður og lat rættin kóka spakuliga, meðan tú rørir í grýtuni, so sósin ikki brennist. Hygg at pakkanum, hvussu leingi pastan skal kókast, og legg nakrar minuttir afturat. Tað er tí at pastan kókar við lægri hita í sósini, enn um tú kókar hana í vatni.

Tá pastan er kókað so væl, sum tú kundi hugsað tær, tað vil siga einar 3-4 minuttir eyka, koyrir tú rivna parmesanostin og mozzarella, skornan í minni bitar, í rættin. Rør væl saman.

Smakka rættin til við salti og pipari. Borðreið við hakkaðari persillu og rivnum parmesanosti.

Tilfar til italska kryddblandið

Øll kryddini eru turkað

• 3 spsk. av persillu
• 3 spsk. av basilikum
• 3 spsk. av oregano
• 1 spsk. av hvítleykspulvuri
• 2 tsk. av leykpulvur
• 1 tsk. av timian
• 1 tsk. av merian
• 1 tsk. av kiliflakum
• 1 tsk. av frískum pipari

Italsk kryddblanding

Blanda øll kryddini væl saman og goym í einari krukku ella øðrum lufttættum ílati.

Tær tørvar ikki so nógv til hendan rættin, so til ber at goyma restina til eina aðru ferð.

Eigur tú ikki alt á listanum inni, kanst tú noyðast við tí, tú longu hevur í kryddarískuffuni. Vel tíni yndiskrydd og smakka til, her er alt loyvt.