Foreldur og børn læra at matgera saman

Tvey skeið í matgerð fyri foreldur og børn verða fyriskipað í heyst. Tey fara at byggja á grundsjónarmiðini í Matarvarðanum, sum FK og FDB lótu gera í 2011.

Í heyst verður skipað fyri tveim­um dagsskeiðum í matgerð fyri foreldur og børn. Tað er Hús­ar­haldsskúli Føroya í Klaks­vík, sum, saman við Føroya Keypssamtøku, skipar fyri skeiðunum.

– Vit hava merkt ein ávísan tørv á einum tílíkum matskeiði fyri foreldur og børn. Fleiri fyri­spurn­ingar hava verið, og nú vilja vit royna um veruligur áhugi er fyri slíkum skeiði, sigur Jóhanna á Tjaldrafløtti leiðari á Húsar­halds­skúla Føroya.

Kanska fleiri skeið seinni
Í fyrsta umfari er talan um tvey skeið, ið verða hildin leyg­ar­dag­arnar 29. september og 20. oktober. Verður undirtøkan góð og áhugi annars fyri skeiðum av hesum slag, er ætlanin at halda fram við fleiri skeiðum seinni.

Grundað á Matarvarðan
Umframt sjálva matgerðina fara skeiðini eisini at fevna um nakað av ástøði. Skeiðini verða grundaði á nýggja matarvarðan, sum FK læt gera og geva út saman við FDB á heysti 2011.

Læra góðar matarvanar
Skeið sum hesi hava stóran týdn­ing fyri framtíðar matar­vanarnar hjá børnunum. Í dag verður sum heild brúkt ov lítið av tíð til virk­semi, har foreldur og børn kunnu samstarva um dagligar uppgávur, og tá er matgerð ein sjálvsagdur táttur. Hetta er lærdómur fyri lívið, bæði hjá foreldrunum og ikki minst børnunum.

Á skeiðinum verður hugt eftir, hvat ið kann fáast burtur úr rótum og grovum grønmeti.

Hvat fæst burtur úr rótum og grovum grønmeti?
Fyrstu skeiðini fara at snúgva seg um lutfalsliga einfaldar, men sera heilsugóðar matgerðarhættir. Farið verður m.a. í dýpdina við at finna fram teir ótroyttu møgu­leik­ar, sum eitt nú røtur, eplir og ymisk groft grønmeti hava at bjóða í sambandi við matgerð, bæði tá ið talan er um døg­urða­mat, baktur, suppur og tílíkt.

Gott fyri familju­trivn­aðin
At skipa fyri skeið­um av hesum slag er ikki ókent aðrastaðni, eitt nú í Danmark, har skúlarnir hava ein virknan leiklut í sam­bandi við skeiðini. Skeiðini eru eitt gott høvi at lata foreldur og børn virka saman um at loysa dagligar og ítøkiligar uppgávur av grund­leggjandi slag, sum eru av stór­um týdningi fyri trivnaðin í familj­uni.

Tað er lærdómur fyri lívið at gera mat saman, bæði fyri børn og foreldur.

Eitt foreldur og tvey børn
Skeiðini verða skipaði soleiðis, at fyri hvørt foreldur kunnu tvey børn í skúlaaldri verða teknaði. Lut­tøku­gjaldið er 500 kr fyri hvørt for­eld­ur og 100 kr. fyri hvørt barnið. Fyri­skipararnir gera vart við, at talið av luttakarum er avmarkað. Tey, sum tekna seg fyrst til skeiðið eru tey, sum fyrst sleppa framat.

Heildagsskeið leygardagar
Skeiðini byrja kl. 9 á morgni og vara til umleið kl. 17. Íroknað skeiðs­gjaldið er undirvísing, undir­vísingartilfar umframt mat­ur. Freistin at tekna seg til skeiðið, ið verður 29. september er 21. sept­ember, og til skeiðið, sum verður 27. oktober er freist­in 19. oktober.

Tekning hjá Húsarhaldsskúla Føroya
Tekningin fer fram á Húsarhalds­skúla Føroya, tel 456974 ger­and­­is­dag­ar millum kl. 9 og 15, har meira fæst at vita um skeið­­ini. Eisini ber til at melda til við at senda teldupost til til
hsf@olivant.fo, ella umvegis heimasíðuna: www.husarhaldsskulin.fo